DAB+
Do che la stazion radio ie unida metuda su tl ann 1979 da Ivo Walpoth, Arno Mahlknecht y Oswald Rifesser, iel unì mudà plu suvënz patron.
Dal 1991 incà ie Radio Gherdëina Dolomites tla mans dla familia de Franz Rabanser de Urtijëi, che cun pascion sta a cë de na gran scuadra de cunlauradëures ulentifs.
Dal instà dl 2023 incà mëina Hannes y Sandra Rabanser l radio, cun gran entusiasm y cuntentëza per n team de marueia, n svilup y renuvamënt tecnich, n miuramënt di njins per la trasmiscion y n ngrandimënt dl raion curì cun l DAB+, coche nce pusciblteies de retlam nueves y de suzes.
Radio Gherdëina Dolomites ie l sëul radio privat che fej trasmiscions tla rujenedes ladina, tudëscia y taliana. Chësc radio, che ie unit scialdi populer, ie da audì ora per duta la valedes Ladines (Gherdëina, Val Badia, Fascia, Fedom y Ampëz), te Puster, tla Val de Isarch, a Bulsan y tl Unterland, a Maran, sun Renon y tl raion dl Scilier.
La Familia Rabanser deberieda cun si cunlauradëures ti tën cumpanìa a chi che scota su Radio Gherdëina Dolomites uni di 24 ëura sun 24 cun trasmiscions n direta, cun nfurmazions atueles dal mond dla cultura, dla politica, dl sport y dl soziel, y sambën nce cun trasmiscions de ntratenimënt acumpaniedes da de bela mujiga nternaziunela y ladina. 10 menuc dan uni ëura possen audì la nutizies atueles sun l mumënt sibe dala provinzia, dala Talia che nce dal rest dl mond n cunlaurazion cun l’agenzia de stampa RMI de Bulsan l “Südtirol Journal”.
De biei retlames curei nchin ti mëndri particuleres, nfurmea y cunsieia i y lascutadëures n con’ de cie cumpré y dla manifestazions dl mumënt.
Radio Gherdëina, vosc radio numer un tla Dolomites, cun n bel program rich de mujiga, la ultima nutizies atueles dl luech, provinzieles, naziuneles y nternaziuneles, trasmiscions y ntervistes d’uni sort.
Nosc radio ie unì metù su tl ann 1979 per ti pité ala jënt nfurmazions n con’ de dut chël che suzed te nosta valedes. Dala mujiga ladina al pop y rock, veniel lascià jì na gran vela de hits y trasmiscions, per scumencé cun energia y mutivazion tl di nuef.
